Biographie (lu)

Ee Stader Jong. Märel, Gaasperech, Gare, Hollerech – dat si meng Statiounen. Mat Roum a Rio ass Lëtzebuerg fir mech déi schéinste Stad vun der Welt.

Theolog a Philosoph. An enger Mathematikerfamill gebuer interesséiert mech Naturwëssenschaft enorm, virun allem d’Astronomie.

„Ech war beim läschte Space-Shuttle-Start a Florida derbäi. Beim Theologie-Studium zu Tréier an 8 Joër zu Roum wollt ech verstoën, wat nach méi wäit an héich geet wéi eng Rakéit.“

Ech hunn och nach een Zertifikat iwwert „Nachhaltige Entwicklungs-Zusammenarbeit“ an ee Fernstudium iwwert Glëck gemaach.

Ee Weltebummler. Reesen op déi 5 Kontinenter, vill vun deenen mat Jugendgruppen. Ech hunn 11 Sproochen geléiert, fir d’Mënschen ze verstoën. Meng wichtegst Rees war am Alter vun 21 Joër a Brasilien: hei hunn ech eng immens lieweg, jonk, musikalesch, danzend a sozial engagéiert kathoulësch Kierch kennegeléiert. Ech war begeeschtert.

„Ech hunn d’Liewen vun deenen Aarmen an de Favelas gedeelt a verstanen, wat hinne Kraaft gëtt. Dat huet mech erstaunt, faszinéiert a verännert.“

Säitdeem präge mech 3 Saachen: den Asaz fir déi Jonk, d’Engagement fir déi méi Schwaach, d’Faszinatioun fir d’Kraaft vun enger Iwwerzeegung, engem Glawen oder enger Begeeschterung.

Ee gleewëge Mënsch. Ech liewen dat als Chrëscht an der kathoulëscher Kierch. D’Liewen ass fir mech hellëg. Ech war 11 Joër laang Paschtouer. Ech konnt vill Gedanken iwwert de moderne Glawen an der Press deelen. De Glawen u Gott steet fir mech am Déngscht vun der Zefriddenheet vum Mënsch. De Kär vun der Relioun ass de Fridden.

Sportler a Kënschtler. Futtball, Dëschtennis, Velo, Badminton, Mountainbike, Molen, Fotograféieren, Kino – meng Aarten fir d’Liewen ze erliewen. Ech hat vill Chance am Liewen, well et mer gutt geet.

„Meng Liewensfreed wëll ech mat aneren deelen.
Ech engagéiere mech, fir dass et all Mënsch gutt geet, souwuël bei der Caritas wéi och am Privaten an an der Politik.“

Optimist, liewensfrou, iwwerzeegtënen Europäer an ee Krauselkapp. Ech gleewen un dat Gutt an ënnerstëtzen alles, wat gutt ass an d’Mënschen zesumme féiert. Ech sinn de Paul.

Biographie (fr)

Originaire de la très belle ville de Luxembourg j’ai successivement habité dans les quartiers Merl, Gasperich, Gare-Rousegärtchen et Hollerich. A côté de mes intérêts sportifs (foot, tennis de table, velo, badminton) et associatifs (scouts, enfants de chœur) ce sont surtout mes voyages qui m’ont inspiré. 1994 au Brésil j’ai senti l’appel d’être prêtre au sein d’une Eglise dynamique, joyeuse et au service des plus pauvres. Après mes études de doctorat à Rome j’étais curé-adjoint à Esch-sur-Alzette et responsable des pastorales des jeunes et des vocations. Durant l’année sabbatique 2010 j’ai décidé de commencer un nouveau chemin : d’être libre pour une relation et de commencer à travailler sur le projet Young Caritas.

Meng Visioun

1
All Liewen huet een onendleche Sënn, an all Mënsch ass onendlech wäertvoll.
2
D’Zefriddenheet steet fir mech am Mëttelpunkt. Gléck ass ëmmer ee Cado, mee Zefriddenheet ass eng Haltung, déi ee léiere kann. Dobäi wëll ech hëllefen. D’Zesummeliewen ass fir mech d’Geheimnis vun eiser Zefriddenheet. Bei allem, wat ech maachen, versichen ech, Mënschen zesummen ze féieren. Et bréngt Faarf an eist Liewen.
3
Dofir setzen ech mech fir d’Existenz an d’Qualitéit vum Liewe vun all Mënsch an. Dofir sinn ech iwwerzeegt, dass mer eis kierperlech, geeschteg a séilesch Gesondheet versuerge sollten; ët gëtt nämlech een nohaltegen Ëmgang mat eiser Welt a mat eis selwer. An dofir hunn ech Respekt virun den Déieren, der Natur an allem, wat lieft.
4
All Mënsch ass fräi, besonnesch fräi vum Drock an den Erwaardungen, déi anerer un hie riichten. Besonnesch als Coach an als Begleeder hunn ech geléiert, dass ech kengem meng Meenung opdrängen, mee just hëllefen dierf, fir dass deen aneren seng eegen Aart fanne kann, fir zefridden a frou ze sinn. Ech lauschtere gären no, well ech beandrockt si vun der Liewenswäisheet vu ville Leit. Ech léieren ëmmer erëm bäi an huelen dat seriö, wat ech uvertraut kréien. Well de chrëschtleche Glawen dervun ausgeet, dass all Mënsch gläich wäertvoll ass an dass mer fräi si géintiwwer allem, wat eis vu bannen a bausse bedrängt, ass dee Glawe fir mech zum Ausgangspunkt vu menger Visioun ginn.
5
Wat mech bei Mënschen am meeschte beandrockt, sinn Dankbarkeet, Gemeinschaftssënn, d’Fäegkeet ze verzeien, Iwwerzeegung a Motivatioun souwéi aktivt a partizipativt Engagement, besonnesch fir déi méi Schwaach!