Den 21.August 2020 ass mengem Bopa Félix säin 102.Gebuertsdag. Ech sinn immens frou mat him an hu ganz vill bei him geléiert.
Während der Coronazäit hunn der vill vun eis hir Grousselteren net gesinn. Oder vläicht sinn se scho verstuewen, mee mir droen se awer weider am Härz.
Si sinn oft wéi ee Schatz. Dat sollte mer hinne soen. Dofir ass des Idee vun engem Poesiealbum entstanen.
Wéi kann ee matmaachen? Ganz einfach an 3 Schrëtt.

1.Schrëtt:

Dir kënnt iech fir all Boma oder Bopa eng Säit vum Poesiealbum als PDF eroflueden. Entweder faarweg oder schwaarzwäiss. Et gi 4 Musteren zur Auswiel: Stil 1920er Joren, Stil 1930er Joren, Stil 1940er Joren oder Stil 1950er Joren.

Si sinn designed vum Aitana Kugeler, https://instagram.com/aitana.kugeler

2.Schrëtt:

Et wär mega, wa mer kéinte MAT eise Bomaen a Bopaen hir Säit ausfëllen. Dat gëtt bestëmmt ee lëschtege, vläicht souguer ganz perséinleche Moment! WNn een deem anere seet, wat een ëmmer schon eng Kéier soe wollt…
Mee dir kënnt se och FIR si ausfëllen, z.B. wann der net bei är Bomi oder Bopi goe kënnt oder si scho verstuewe sinn.
Natirlech kënnt der fir all Bomi a fir all Bopi eng Säit ausfëllen.
A wann der wëllt, maacht der uewen eng Foto derbäi. Eng zesummen oder eng vum Bopa oder der Boma.

3.Schrëtt:

Dir schéckt mir et fir an de Poesiealbum. Mat alle Säiten gëtt en eng Schatzkëscht fir all eis Grousselteren. Dir musst dofir ONBEDÉNGT och dat Datenschutz-Blad ausfëllen. Wann är Bomi oder äre Bopi nach liewen, musse si mat ënnerschreiwen. Soss geet et duer, wann dir eleng ënnerschreift.
Dir kënnt d’Säit op 3 Weisen schécken an um Datenschutz-Blad dat deementspriechend ausfëllen:
1. Wann der wëllt, dass d‘Säit an de virtuelle Poesiealbum hei op www.schatzkescht.lu kënnt, da musst der mer d‘Säit scannen an se op paulgalles@gmail.com schécken. Scannt och w.e.g. d‘Datenschutz-Blad.
2. Wann der wëllt, dass d‘Säit mat an ee gedrécktenen Album drakënnt, da schéckt mer ausserdeem am beschten d‘Original och op meng Postadress: Paul Galles, 56, rue de Vianden, 2680 Luxembourg. Da kënnt der mer och d‘Datenschutzblad direkt mat schécken. Wann der d‘Original vun der Poesiesäit hale wëllt, da geet de Scan duer, mee da musst der um Datenschutz-Blad ukräizen, dass et och an de gedrécktene Poesiealbum kënnt. Iwwregens: ech wärt jiddferengem, deen am gedrécktene Poesiealbum mat mécht, ee gedrécktent Exemplaire schenken, fir iech an är Grousselteren.
3. Op Facebook hu mer dee Grupp „Schatzkëscht fir eis Grousselteren“: facebook.com/groups/3521080204636807 Wann der d‘accord sitt, dass är Säit do gewise gëtt, da kënnt der se selwer do als JPEG eroplueden. Vergiesst just net, dat um Datenschutz-Blad auszefëllen.
Zousätzleche Schrëtt:
Wann der nach eppes Zousätzleches maache wëllt, z.B. ee Video mam Bopi, d‘Lieblingsrezept vun der Bomi, ee Bild vun engem Kand fir d‘Grousselteren, da setzt et an de Facebook-Grupp oder schéckt mer ee Scan fir an de Poesiealbum.
Merci iech all, dass der mat maacht. All är Bäitreeg si Pärelen am Schatz. An all Mënsch ass een Tresor. An eis Grousselteren sinn ee ganz besonnesche Schatz!

Datenschutz-Formuär (RGPD)